Notikumu kalendārs

    Decembris    

Izveiduots 2. raidejums saimem ar bārnim “Žik!”

15.10.2019, 09:30

 

Itymā rudinī jaunū sezonu uzsuocūt Latgolys reģionaluo televizeja veidoj jaunu raidejumu cyklu latgalīšu volūdā saimem ar bārnim “Žik!”. Nūsaukuma izvielī paleidzeja dzejneica Anna Rancāne i projekta vadeituoja Ausma Sprukte cer, ka taišņi taipoš kai romana i kinofilmys “Cylvāka bārns” golvonajam vorūņam Boņukam lobuokīs draugs beja suneits Žiks, ari itys raidejumu cykls kļius saimem ar bārnim par lobuokū nūdarbi i īspieji laiku pavadēt kūpā.

 

 

Niule ir izveiduots raidejumu cykla “Žik!” 2. raidejums i tys veļteits literaturys temai. Tuo laikā raidejuma vadeituoja Rēzeknis Vaļsts pūļu ģimnazejis 3. klasis škoļneicai Adrianai Goroščakai stuosta par gruomotu laseišonu, dzejūļim i literaturu kūpumā. Raidejuma pyrmajā dalī sazateikom ar Juganu saimi, kur mama Ineta ir vairuoku bārnu dzejūļu kruojumu autore, a juos meita Agneta vuicās ari muokslys školā i zeimej mamys dzejūļu kruojumim ilustracejis. Sovpus raidejuma ūtrymā dalī ruodeisim, kai nūteik nūvodvuiceibys stundis Nautrānu vydškolā, kur itū tradiceju – vuicēt bārnim latgalīšu volūdu, literaturu, vēsturi i ģeografeju uztur jau 20 godus. Raizī ar raidejuma vadeituojom i Nautrānu vydškolys audzekņim skateituoji varēs īzavuicēt ari pīcus vuordus latgalīšu voldūdā par literaturu i dzeju, pīmāram, izzynuot, kū nūzeimej taidi vurodi kai puslopa, klaida, šveikstēt i.c.

 

Pavysam raidejumu cyklā “Žik!” byus pīci raidejumi saimem ar bārnim latgalīšu volūdā, kurus turpmuok varēs nūzavērt kanālā Re:TV kotru svātdiņi pl. 21:00. Vāluok raidejumim byus ēters ari kanālā RīgaTV 24. Taipoš dīnu vāluok pec ētera raidejumu varēs atrast ari škārsteikla lopā www.lrtv.lv, LRT socialū teiklu kontūs www.facebook.com, www.youtube.com.

 

Raidejumi tūp konkursa “Par raidījumu veidošanu 2019. gadā Latgales reģionālajos un vietējos plašsaziņas līdzekļos, kas raida televīzijas programmas” gaitā, kū finansej Nacionaluo elektroniskū plašsaziņis leidzekļu padūme sabīdriskuo pasyutejuma ītvorūs. Lels paļdis Latgolys Kuļturviesturis muzejam i Rēzeknis piļsātys bārnu bibliotekai par fiļmeišonys telpom i Rēzeknis nūvoda vokalajai studejai “Skonai” par reidejuma muzykalū pavadejumu – dzīsmi “Breinumu myužs”.

 

Ausma Sprukte

raidejuma “Žik!” vadeituoja

Dalīties ar galeriju: