Notikumu kalendārs

    Jūlijs    

Bīdreiba “Latgolys Studentu centrs” aicynoj īsasaisteit gruomotys izdūšonā!

11.07.2017, 10:19

 

Latgalīši ir izslaveiti na viņ ar sovu sirsneibu, lobsirdeibu i vīsmīleibu, bet ari ar cīši lobu homora izjiutu. Tū apsazynojūt, bīdreiba “Latgolys Studentu centrs” ar bīdreibys “LR” atbolstu, ituo gods rudinī planavoj izdūt suleigu latgalīšu humora apkūkopojumu gruomotā “Kas bez bikšu — tys bez bādu!”.

 

Kabatys formata guomotā tiks apkūpuota latgalīšu myusu dīnu mutvuordu folklora – izteicīni, jūki, anekdoti, tosti, loba vielejumi, kū sevkurs skaiteituojs vareis izmontuot kai špikeri svātkūs ci puorskaiteit kasdīnā lobuokam nūskaņojumam. Teksti byus papyldynuoti ar fotografejom i ilustracejom.

 

Sevkurs zyna, ka latgalīšim ir eipoša humora izjiuta, kurā mozi navaineigi jūceni mejās ar izsmalcynuotu sarkasmu i pat ar malnū humoru. Paraleli stuostu i anekdotu gruomotam, kurys niu daejamys, LgSC skaiteituojim grib pīduovuot taišni apleicejūs cylvāku izteicīņus, atgadejumus nu dzeivys, tostus i loba vielejumus, kas kasdīnā teik lītuoti i ir aktuali. Par pīvadumu, nazkod ļauds smējēs, ka vysta na putns, a buoba na cylvāks. Niu, lai vystys siež loktā i diej ūlys, par tū ka: “Opeļs nav mašyna, buoba nav cylvāks!”. Voi navys “Lobuok vāluok kai nikod”, bet “Lobuok vāluok kai veļ vāluok…”. Ci veļ pīvadumam: “Cik gryuts ir byut latvīšam, ka naesi latgalīts!”

 

LgSC jaunīši jau ir salasejuši pusi nu gruomotys satura – pīrakstejuš i saglobojuš vacus, jaunus jūkus, izteicīņus i c. Grybam pasaceit lelu paļdis rodim, draugim i vysim tim, kas pasadalieja ar sovim jūkim i izteicīnim syutūt e-postus, sms, teikūtīs i zvonūt, kai ari tīm, kuri pasadaliejuos sovuos modernuos mutvuordu foklorys zynuošonuos Latgolys symtgadis kongresa nūtikšonu laikā Rēzeknē.

 

Tai kai gruomotā grybam likt jūkus (tostus i loba vielejumus), kas ir aktuali i teik kasdīnā lītuoti, aicynojam sevkuru, kam nav svešs eistyns i suleigs latgalīšu humors, īt tolkā LgSC i īsyuteit kaidu gordu jūku, frāzi, izteicīni, anekdotu, ci vielejumu, kab kūpeigim spākim saglobuot myusu laika humora pierlis.

 

Informaceju  lyudzam syuteit iz e-postu daugovpils@lgsc.lv.

 

Sagatavieja: Gunta Nagle

Bīdreiba “Latgolys Studentu centrs”

Dalīties ar galeriju: